Аягөз станциясының су тасқынынан зардап шеккен тұрғындарына теміржолшылар алдымен көмек қолын созды

«ҚТЖ-Жүк тасымалы» еңбеккерлері су тасқыны салдарын жоюға белсенді кірісуде. Су шайған үйлерді тазалауға көмектесуде. Аягөз өзеніндегі тоспаны көтеріп, су ағыны жырып кеткен тұсты жабуға қапшықтар тасу жұмысына 70 теміржолшы қатысты. Су тасқынынан зардап шеккен тұрғындардың жағдайын Семей жүк тасымалы бөлімшесі мен кәсіподақ жетекшісі барып, көрді.

Сондай-ақ, теміржолшылар бөлімшедегі су басу қаупі бар нысандарды аралап, пойыз қозғалысына қауіп туғызатын тұстарды анықтады.

-Тасымалдау жұмысына су тасқыны әсер ете қойған жоқ,-дейді Семей жол бөлімшесінің директоры Марлен Көкірекбаев.

Су тасқыны Аягөздегі 23 теміржолшылының отбасына зардабын тигізді. Жиырма үй қалпына келтірілетін болса, үш үй толығымен қираған.

Семей жол бөлімшесінің еңбеккерлері арнайы қорға айлық жалақыларының екі пайызын тұрақты аударып отыруға шешім қабылдады. Жалпы көмек көлемі шамамен 14-15 миллион теңге мөлшерінде болмақ.

Тағдыр қиындығымен кез келген аягөздіктерге қайырымдылық көмек жасау үшін станцияда «Нұр Отан» партиясы мен әкімдікпен бірлескен штаб құрылды.