ҚР мен ӨР т/ж әкімшілігінің сарыпшылар тобы Өзбекстан және Ауғанстан бағытында астық пен ұнды үздіксіз жеткізуді қамтамасыз ету мәселелерін талқылады

2018 жылдың 17 шілдесінде «Қазақстан теміржолы» ҰК» АҚ және «Узбекистонтемирйуллари» АҚ компаниялар тобының сарапшыларының бірлескен сапары аясында Өзбекстан мен Ауғанстанның терминалдық- қоймалық инфрақұрылымы мен шекаралық станцияларына бағалау жүргізілді.

Сарапшылар тобының мүшелері Термез қаласында, Габаба (Өзбекстан) станциясы мен Хайратон (Ауғанстан) қаласында болып қайтты.

Көшпелі іс-шараға ҚР Ауыл шаруашылығы министрлігі, «Атамекен» ҚР ҰКП, «Қазақстан астық өңдеушілер одағы» ЗТБ мен «Азық-түлік корпорациясы» АҚ-ның өкілдері қатысты.

Сарапшылар тобы Хайратон қаласының әкімі Абдурауф Амиримен, сондай-ақ Ауғанстанның ірі жүк алушыларымен кездесті. Кездесу барысында қазақстандық жүктерді жеткізуді ұйымдастыру мәселелері, Ауғанстаннан экспорттық жеткізілімдерді дамыту перспективалары талқыланды.

Мемлекеттік құрылымдардың, теміржол және логистикалық ұйымдардың, Ауғанстанның іскер топтарының өкілдері серіктестік қарым-қатынастар орнатуға және өзара тиімді ынтымақтастыққа қызығушылық танытты.