Мәңгілік алау, бір минут үнсіздік...

Жеңіс күні қарсаңында Ақтөбе локомотив пайдалану депосы соғыс ардагерлерін жинады. Ұзақ жылдар локомотив шаруашылығында еңбек еткен соғыс және еңбек ардагерлері мәңгілік алауға гүл қойып, қаруластарын бір минут үнсіздікпен еске алды.

Саз сырнайда әскери тақырыптағы әндер төгіліп тұр. Ақтөбе локомотив пайдалану депосының директоры Талғат Медеубаев ардагерлерді Ұлы Жеңіс мерекесімен құттықтады. «Қадірлі ардагерлер! Майдан шебінде жаумен арпалысып отан қорғаған батырларымыздың қатары, өкінішке орай сиреп барады. Өмірлерінің ең қымбат жылдарын, жастық шағын соғысқа арнаған боздақтарымызды біз ешқашан ұмытпаймыз, жүз жасаңыздар! – деп тілек білдірді депо басшысы .

Өз кезегінде, Ақтөбе локомотив жөндеу депосының директоры Асқар Хамзин де ақсақалдар мен ақ жаулықты аналарды құттықтап, қарияларға осы күнге аман жеткізгендері үшін, қазіргі ұрпақтың бейбіт заманда өмір сүріп жатқаны үшін алғысын жеткізді.

Қариялар атынан сөз алған локомотив шаруашылығы ардагерлер кеңесінің төрағасы Александр Алпысбаев бейбіт күннің қадіріне ештеңе жетпейтінін айтты. Салтанатты шара соңы мерекелік дастарханмен жалғасты. Сырнайдың сүймелдеуімен майдан әндері орындалды. Қосыла шырқаған майдангерлер мен тыл ардагерлері көздеріне жас алып, естеліктерімен бөлісті.