Теміржолшылар – Мәжіліс депутаты
Кеше Елбасының төрағалығымен «Нұр Отан» партиясы саяси кеңесі бюросының отырысы өтіп, онда ҚР Парламенті Мәжілісі VІ шақырылымы депутаттығына аталған партия атынан сайланған отандастарымыздың тізімі бекітілді.
Енді халық қалаулылары ретінде жоғары мінберден теміржолшы қауым сөзі мен мұң-тілегін екі тұлға сөйлеп, қорғамақ. Олар осыған дейін «ҚТЖ» ҰК» АҚ вице-президенті қызметінде істеген көлік саласының білікті маманы Роман Скляр мен Қызылорда локомотив пайдалану депосының машинист көмекшісі дәрежесінде тер төккен қарапайым еңбек адамы Геннадий Шиповских болып отыр. Генадий мемлекеттік тілді еркін меңгерген, «ҚТЖ» ҰК» АҚ қабырғасында ұйымдастырылған «Қазақша сөйлейік» байқауының бас жүлде иегері. Өзінің әңгімелеуінше, негізінен балалар үйінде өскенімен, 13 жасынан қазақ отбасы бауырына басқан. «Әкем Мұрат Насыров мені еркелетіп «Алтынбек» дейді. Бала жастан қазақы жерде өсіп, қазақ балабақшасына барып, мектепті де қазақша бітірдім. Сондықтан, қазақ тілі – менің екінші ана тілім. Барлық замандастарыма қайда жүрсек те, «қазақша сөйлейік» деп айтқым келеді» дегені есімізде.
Қазақстан Президенті сайлау үдерісін 1000-ға жуық байқаушылар мен әлемнің 51 елінен 150-ге тарта бұқаралық ақпарат құралдарының өкілдері бақылағанын келтірді. Сайлау ашық, жария түрде өтіп, жоғары деңгейде ұйымдастырылды деп танылды. Жалпы алғанда, қазақстандықтар бірлігі мен тұтастығын, сондай-ақ ел дамуына үлес қосуға ұмтылысын паш етті. Мемлекет басшысы жаңа шақырылым депутаттары сенімді ақтауы тиіс екендігін, өйткені оларға Ұлт жоспарын тиімді жүзеге асырудың айрықша жауапкершілігі жүктелетінін ескертті.
