Техжаңалық жаршысы

Техжаңалық жаршысы

Қызылорда локомотив пайдалану депосының техникалық жаңалықтар мен рационализаторлық ұсыныстарды жинақтап, жүйелеп, ережелер мен талаптарға сай ретке келтіріп, «АСУ НТИ» бағдарламасына жүктеп, тиісті құзырлы орынға жөнелту депоның жетекші инженері Қызғалдақ Оспымбетоваға жүктелген.

Қызғалдақ осы уақытқа дейін 30-ға жуық техникалық жаңалықтарды жинастырып, филиалдар арасында таратып үлгерген.

Мәселен өткен жылы «ТЭД қаптамаларында болатын киіз төсемдерді қыздырып, кептіруге арналған ыдыс» тақырыбындағы ұсыныстың пайдасы зор көрінеді. Себебі, ұсыныс ТЭД жұмысының сапасын арттырып, жақсартуға септігін тигізеді деп бағаланған. Және-де «Д-50 цилиндр қақпағының ендірмелі бағыттағыш втулкасын қайта қалпына келтіру» тақырыбындағы ұсыныс ТЭМ2 сериялы тепловоздың бағыттағыш втулкасының жаңалануына үлес қоспақ. Осы сериядағы тепловоздардың бағыттағыш втулкасының 40 пайызы тозығы жеткендіктен ауыстыруды қажет етеді. Жоғарыда аталған екі ұсыныс депоның локомотив қабылдаушысы Молдаш Ізтілеуов тарапынан жасалыпты. Тепловоз машинисі Анатолий Скачков пен инженер-технолог Александр Абрамов ойластырған «ТЭМ2 сериялы тепловоздың тифон клапанын жаңалау» тақырыбындағы рационаизаторлық ұсыныстың да маңызы жоғары, экономикалық тиімділігі басым екен.

— Өткен жылы «Локомотив» АҚ басшылығы тарапынан біздің деподан үш рационализаторлық ұсыныс беру жоспарланып, үшеуін-де орындадық. Ұсынысымыздың біреуінің экономикалық тиімділігі 472 320 теңгені құрады, — дейді Қызғалдақ Оспымбетова.

Сабырхан СЕЙІЛБЕКҰЛЫ, Қызылорда