Күдіктілер құрықталды

Бұған дейін Мақат локомотив пайдалану депосының машинисі Руслан Қалиев пен машинист көмекшісі Есенжан Молдабатыровтың қырағылық танытып, рельске байланған шпалдарды байқап қалып, үлкен апаттың алдын алғанын хабарлаған болатынбыз.

Осы оқиға бойынша дереу қылмыскерлерді іздестіру шаралары жүргізілді. Атырау көлік прокуроры Берік Құлмағамбетовтың айтуынша, нәтижесінде қылмысқа қатысы бар деген Шоқпартоғай аулының күдікті 17 және 18 жасар екі тұрғыны ұсталды. «Оларға қатысты ҚР ҚК 350 бабының 1 бөліміне сәйкес («Көлік құралдары мен байланыс жолын қасақана жарамсыз күйге келтіру») қылмыстық іс ашылды. Олардың бұл ісі бұзақылық жолмен немесе басқа оймен істегенін тергеу барысы шешеді» дейді прокурор. Аталған бап бойынша айыппұлдан бөлек төрт жылға дейін бас бостандығынан айыруға дейін жаза кесілуі мүмкін.