Машинист төтенше жағдайдың алдын алды

№ 39 «Санкт-Петербург – Астана»жолаушылар пойызының машинисі кәсіби шеберлігі, батыл шешімінің арқасында ауыр зардаптарға апаратын төтенше жағдайдың алдын алды.

Тамыздың 14-інде Қостанай облысындағы Қайрақ-Медет қума жолында 13 вагоны бар пойыз трактордың тіркемесімен соқтығысып қалды.

-Жолдың сол жақ қанатында «Белорус» тракторы үш тіркемесіне тиелген шөбімен тұрған. Бізден 150-100 метрдей жерде тұрған трактор қозғала бастады,- дейді Қостанай локомотив депосының машинисі Александр Фурцов.

Машинист бірнеше қайтара дабыл қағып, белгі бергенімен буферлік жарығын қосқан. Амалсыз шұғыл тежегішті басып үлгергенімен өте жақын келіп қалған трактормен соқтығысуға тура келді. Болған жайды радиобайланыс арқылы А. Фурсов өзі диспетчерге хабарлаған. Трактор жүргізушісінің темір жол өткелінен өту тәртібін бұзу жағдайы, апатты жағдайға алып келді. Алайда, машинистің сауатты іс әрекетінің нәтижесінде мыңдаған пойыз жолаушылары ешқандай зардап шеккен жоқ.

Жыл басынан бері машинистер 699 рет шұғыл тежегішті басып, көптеген адамдарды апаттан аман алып қалды.