Құрметті демалысқа шықты

Көлік еңбеккерлерінің күнін мерекелеу қарсаңында «Локомотив» АҚ-ның орталық аппаратында арнайы жұмыс жөніндегі бас маман Сағындық Сүлейменовты құрметті демалысқа шығарып салу шарасы өтті.

Сағындық Қабдрашұлының бар еңбек жолы еліміздің құқық қорғау органдарында өтті деуге болады. «Локомотив» АҚ-да ол компанияның негізі қаланғаннан бастап, он жылға тең уақыт қызмет еткен. Пайғамбар жасына қарамастан, әлі-де болса тың, өзіне деген сенімділігін жоғалтпаған.

— Тағы бір белесті артта қалдырдық. Өмірімнің осы бөлігін әрдайым тек жылылықпен ғана еске аламын, — дейді Сағындық Қабдрашұлы. — Қолдау және түсіністік білдірген компания ұжымы мен басшылығына алғысым шексіз.

— Сізді құрметті демалысқа шығара отырып, бар ұжымның атынан ерен еңбегіңіз үшін шексіз алғысымызды білдіреміз. Үлкен тәжірибеңіздің, адалдығыңыздың және жауапкершілігіңіздің арқасында Сіз әріптестеріңіздің арасында жоғары құрмет пен беделге қол жеткізе алдыңыз, — деп атап өтті өз сөзінде «Локомотив» АҚ Президенті Марат Медеубаев.

Теміржолшылардың төл мерекесі қарсаңында ұйымдастырылған осы атаулы күні Сағындық Қабдрашұлына «Қазақстан темір жолына 110 жыл» естелік белгісі мен Құрмет грамотасы табыс етілді.