Екі «Эволюшн» берілді

Бейнеу айналым депосына биыл екі «Эволюшн» тепловозы берілді. Айналым депосының бастығы Жанболат Жоламановтың айтуынша, бұл тепловоздар Бейнеу мен Мақат станциялары аралығына жүк пойыздарын тасымалдауда.

– Жаңа тепловоздардың келуіне орай 55 локомотив бригадасы оқудан өтті. Ақтөбе мен Атыраудан оқытатын машинист нұсқаушылар шақырылды. Қазіргі таңда барлық машинистер мен олардың көмекшілері «Эволюшнді» жүргізуді меңгерді, – дейді айналым депосының бастығы.

Бүгінгі таңда тоғыз жолдың торабына айналған Бейнеу станциясы арқылы жүк тасымалы жылдан жылға артып келеді. Ұзақ мерзімге шыдамды, жиі жөндеуді қажет етпейтін «Эволюшн» тепловоздары 90 күннен астам тексеріске енбей зулай бермек.

Локомотивтердің бесінші буыны қаһарлы қыс пен аптап ыстыққа, құбылмалы ауа райына икемделген. Жаңа маневрлік тепловоздың артықшылығы, жылдамдығы сағатына 120 км алады, сондай-ақ бұрынғы маневрлік тепловоздармен салыстырғанда, ауаға таралатын қалдықтар 40 пайызға, отын мен май жағу 17 пайызға кемитіні де локомотившілерді қуантып отыр.

Райхан РАХМЕТОВА

Маңғыстау