Біз бауырмал халықпыз...
Маңғыстау локомотив депосына отыз жылдан бері абыройлы еңбек етіп келе жатқан машинистердің бірі, лезгин ұлтының өкілі Гидаят Гасанов Қазақстанға жігіт шағында келді.
Әзірбайжан елінен өз қандастарының ортасына Ақтауға келген ол қазақ халқын – өте бауырмал, қонақжай және ақ жүректі ұлт деп санайды.
– Әскерден кейін келіп, өмірімнің жаңа беттерін ашқан Қазақстан елі – бүгінде менің өз Отаным. Тіліміз бен түріміз де ұқсас, әдет-ғұрып салтымыз да ұқсас халықтармыз. Әсіресе, біз де қазақтар секілді өте бауырмал халықпыз. Қазақтардың қыз ұзатуы, құдалық жасауы секілді той дәстүрлері бізде де бар. Қазір мұнда Лезгиндер қоғамында қандастарымызбен бас қосып отырамыз. Осы татулығымыз бен бірлігіміз арта берсін деп тілек айтамын, – дейді машинист.
Темір жолдағы қызметін вагон депосында қарапайым жұмысшы болып бастап, кейіннен локомотив депосына қызмет ауыстырған Гидаят Алладинұлы Атырау темір жол мектебінен машинист көмекшісі мамандығы бойынша білім алады. Жүк және жолаушылар пойыздарын тасымалдауда локомотив бригадасында еңбек ете жүріп, Ақтөбеде білімін жетілдіріп, машинистікке біліктілігін арттырды. Бүгінде 2 сыныпты машинист Маңғыстау станциясында маневрлық локомотивтерді жүргізіп жүр. Үш баланың әкесі атанған жігіт ағасы өмірдің бар мәні – отбасым мен қызметім деп санайды. Әріптестері Гидаятты ақжарқын да көңілді жүретін өте оптимист жан деседі, жиын-тойдың гүлі, әсіресе өз ұлтының биі лезгинканы билегенде жұрттың бәрін таң қалдырады екен.
Райхан РАХМЕТОВА
Маңғыстау
