Темір жолдағы қауіпсіздік оған бала күннен тәрбиелеу қажет
Қазақстандық статистикаға сәйкес, жыл сайын темір жолдарда жүзден аса адамды басып кету жағдайлары орын алады. Олардың 75 пайыздан астамы қаза тапса, қалғандарында адамдар ауыр жарақат алып, мүгедек болып қалады. Бұл қайғылы статистиканы тек теміржолшылардың күшімен тоқтату мүмкін емес, сондықтан жағдайды ұнамды бағытқа қарай өзгерту үшін бүкіл қоғамның мүмкіндіктерін бірлестіру қажет.
– Түйткілді үкіметтік деңгейде шешу керек. Ол үшін мемлекеттік бағдарлама қажет. Тұрғындар арасында темір жол – қауіпті аймақ екені жөнінде насихат жұмыстары жүргізілуі тиіс. Теміржолшыларға ұрыса берудің қажеті жоқ, адамдарды қауіпсіз жүріп-тұруға бала күнінен тәрбиелеген дұрыс. Темір жолды кесіп өтушілер көп жағдайда пойызды тоқтатуға болады деп жаңылысады, оны қас-қағым сәтте тоқтату мүмкін емес, – дейді «Локомотив» АҚ вице-президенті Иван Костыря.
Ол темір жолдарда болатын адам басып кету жағдайларының 99,9 пайызы сол жүргіншілердің өздерінен болатынын ерекше атап өтті. Адамдар жүріп бара жатқан пойыздардың алдынан жүгіріп өтеді, машинистің белгілеріне назар аудармастан, жолды жағалай жүреді. Олар жағдайдың қауіпті екенін дұрыс бағаламайды.
– Кейде кейбір учаскелерде тәулігіне бір-ақ рет пойыз өтетін жағдайлар болады, бірақ сол жерлерде де адамдарды басып кету орын алып жатады. Барлығының себебі біреу – адамдардың бейқамдығы. Машинистер локомотивтің пультіне адам басып кету үшін отырмайды, олардың әрбірінің қатаң белгіленген жолы бар және олар бұл жолдан шығып кете алмайды, – дейді вице-президент.
Оның айтқан деректері бойынша 2 мыңнан аса локомотивтерді шұғыл тежеу оқиғаларынан тек екі пайыз жағдайда ғана адамдарды басып кетудің алды алыныпты. Сол себепті машинистер қайғылы жағдайды болдырмау жөнінде ештеңе істемейді деуге болмайды.
Статистикаға сәйкес, темір жолдарда адам басып кету оқиғалары көктем және күз айларында жиілеп кетеді. Әдетте қайғылы оқиғалар локомотив машинисінің көру мүмкіндігі шектеулі немесе елді мекендердегі адамдар темір жолдарды жиі кесіп өтетін белгілі бір телімдерде орын алады. Қара тізімде Алматы, Ақтөбе, Қызылорда және Қарағанды облыстары «көш бастап» тұр.
Қайғылы статистикалық деректерге жүгінсек, 40 пайыз жағдайда адам басып кету оқиғасы Анна Каренинаның апатқа ұшырауымен ұқсас. 20 пайызында зардап шекендер құлақтарын тығып алып, әуен тыңдаған немесе мас жағдайда болған.
– Өкінішке қарай, темір жол бойында тұратын немесе үйінен жұмысқа бара жатқанда және кері қарай қайтқанда адамдар темір жолды жоғары қауіпті аймақ ретінде қабылдамайды. Бұл қайғылы апатқа соқтырады, – дейді Иван Костыря.
Темір жолдардағы ең қауіпті топ – балалар. Олардың тәртіпсіздігі – ата-аналардың дұрыс көңіл бөлмеуінің, үлкендердің назар аудармайтындығының нәтижесі. Темір жолдарда адам басып кету оқиғалары әрбір елде орын алып жатады. Онымен күрес шаралары да әртүрлі. Ең тиімдісі – темір жолдарды қоршау. Алайда бұл тәсілді біздің елімізде түгел қолдану мүмкін емес.
– Әдетте темір жолдар елді мекендерді екі немесе үш бөлікке бөліп тұрады, сондықтан біз оларды қоршай алмаймыз, оның үстіне кейбір учаскелердегі жүк ағынын есепке алсақ, бұл экономикалық тұрғыдан мақсатқа сай келмейді, – дейді ол.
«Локомотив» АҚ ұжымындағылар темір жолдардағы қауіпсіздіктің басты кепілі – адамдардың қырағылығында екеніне бек сенімді.
Құтмағамбет ҚОНЫСБАЙ
"Айқын"