Түбекке «Эволюшн» келді

            Маңғыстау локомотив депосына Локомотив құрастыру зауытының өнімдері – «Эволюшн» тепловоздары келіп жатыр.

Бір аптадан бері Шиелі станциясынан жеткізілген ТЭ33А сериясындағы бір тепловозбен Маңғыстау-Өзен бағытында жүк және жолаушылар пойыздары тасымалдануда. Бүгінде қызылордалық машинист-нұсқаушылар маңғыстаулық әріптестеріне «Эволюшнмен» жұмыс істеудің ерекшеліктерін үйретіп жатыр.

Шиелі локомотив пайдалану депосының машинист-нұсқаушысы Құбайдолла Маханов аталмыш тепловозбен жұмыс істеудің артықшылықтары өте көп екенін айтады. Ішінде тоңазытқыш, кондиционер сынды барлық тұрмыстық техникалары бар, негізінен компьютермен басқару жүйесі енгізілген. Сондықтан машинистер сол жағынан білімді болса, «Эволюшнмен» жұмыс істеудің еш қиындығы жоқ.

Маңғыстау станциясынан Өзенге жүргелі тұрған бүгінгі бригаданың көшбасшысы екінші сыныпты маңғыстаулық машинист Рысбай Қазиев.

– Әрине, жаңа тепловоздың ерекшеліктері өте көп. Жүргізу әлдеқайда жеңіл. Былай айтқанда, бұрынғы тепловоздардан кейін «шетелдік жеңіл машинаға» мінгендей күй кешесің», -деген ағамыз заманауи темір тұлпарды тізгіндеуге асықты

Райхан Рахметова

Маңғыстау

«Қазақстан теміржолшысы»