«Толағайдан» тамашалаңыз

Сексеуіл станциясындағы локомотив пайдалану депосында еңбек ететін бірнеше машинистер отбасымен республикалық арналардың бірінде көрсетілетін отбасылық «Толағай» телеойынына қатыспақ.

Түсірілім маусым айында Астана қаласында өтеді. Сексеуіл локомотив пайдалану депосы кадрлар бөлімінің менеджері Мөлдір Шаңқұлованың айтуынша, бүгінде екі машинист отбасы мен кадрлар бөлімінен бір қызметкердің отбасы сайысқа қызу дайындалып жатыр.

– Жарысқа қатысушы теміржолшылар Астана қаласында бір апта болады. Оған әр отбасыдан үш адам - ата-анасы мен бір ойын баласы қатысу керек. Жол, жатын орын шығындарын мекеме басшылығы мен кәсіподақ комитеті көтереді, – дейді Мөлдір Шаңқұлова.

Жалпы Сексеуіл локомотив пайдалану депосының қызметкерлері қоғамдық шараларға белсене араласып жүреді екен. Өткен жылдары ұжым қызметкерлері арасында "Көңілділер мен тапқыштар клубы" ойындары ұйымдастырылған. Ал "Көктем аруы" секілді байқауларда арулар бақтарын сынап, ұжымын өз өнерлерімен тәнті етіп келеді. Барлығы 340 адам еңбек ететін депода татулық пен ынтымақ үйлесім тапқан.

Асқар АҚТІЛЕУ, Сексеуіл

«Қазақстан теміржолшысы»