Жолдан өту ережелерін сақтайық...
Арыс локомотив пайдалану депосына қарасты №16 Шымкент айналым депосының ұжымы пойыз қозғалысы қауіпсіздігін әсіресе, жолдан өту ережелерін сақтау бағытында нақты іс-шараларды жүзеге асырып келе жатқанына қарамастан келеңсіз оқиғалардың, жол ережелерін сақтамау фактілерінің орын алып отырғанын айтады.
Өткен жылы темір жол бойында орналасқан елді-мекендер тұрғындары мен студенттер, мектеп оқушылары арасында «Темір жол – аса қауіпті аймақ» тақырыбында үгіт–насихат, түсінік жұмыстары жүргізіліпті. Жылдың соңғы айында «Жол үстінде – адам!» деген қауіпсіздік айлығы ұйымдастырылыпты. Барлық жерлерге жолдан өту ережелері жазылған көрнекті құралдар ілініп, парақшалар таратылған. Десек те, пойыздың ірі қара малмен, автокөліктермен соқтығысу, адамдарды әсіресе, жас балалар мен жасөспірімдерді қағып кету оқиғалары азаймай отыр. Айналым депосының директоры Кенжехан Іскендіров пен еңбек қорғау жөніндегі инженері Әділхан Әметханов бастаған жұмыс тобы жақында Шымкент қаласындағы №79 мектептің мұғалімдерімен, оқушыларымен кездесті. Мұнда депо директоры қордаланған мәселелерді ортаға салды. Өз кезегінде мұғалімдер мен ата-аналар оқушыларға сабақтан тыс кезінде жолдан өту ережелерін үнемі түсіндіріп отыратындарын жеткізді.
– Пойыз құрамы тежегішті баса сала, тоқтай салатын автокөлік емес. Жұртшылық мұны жақсы білуі тиіс. Үлкен-кіші темір жолдан өту ережесін қатаң сақтап, арнайы жерлерден өтіп, сондай-ақ, малдарын қараусыз жібермесе, қайғылы оқиғалар қатары сиреп, машинистердің де жүйкесіне салмақ түспес еді. Әрине, біз ұжым болып, қозғалыс қауіпсіздігін, жолда жүру ережелерін сақтау бағытында түсінік жұмыстарын жалғастыра береміз, – дейді Кенжехан Іскендіров.
Бекзаттар ДІНӘСЛОВ, Шымкент
Қазақстан теміржолшысы
