2025 жылдың 11 айының қорытындысы бойынша «ҚТЖ» ҰК» АҚ желісі бойынша жүк тасымалының жалпы көлемі 287,9 миллион тоннаны құрады, бұл 2024 жылдың сәйкес кезеңімен салыстырғанда 4%-ға жоғары

«Қазақстан темір жолы» ұлттық компаниясының баспасөз қызметінің хабарлауынша, экспорттық тасымал көлемі 80,2 миллион тоннаға жетіп, өткен жылмен салыстырғанда 6,5%-ға артқан. Ішкі республика бойынша тасымал көлемі 161,4 миллион тоннаны құрап, 2,5%-ға өскен.

Көмір тасымалының көлемі 95,7 миллион тоннаны құрады, бұл өткен жыл деңгейінен 3,3%-ға артық. Экспортқа бағытталған көмір тасымалы 8%-ға өсіп, 31,2 миллион тоннаға жетті.

Тыңайтқыштар тасымалы 10,3%-ға артып, 1,3 миллион тоннаны құрады. Астық тасымалының көлемі 36%-ға өсіп, 9,7 миллион тоннаға жетті. Орталық Азия елдеріне 5,6 миллион тонна астық тасымалданып, өсім 32%-ды құрады. Иран бағыты бойынша астық тасымалы екі есеге артып, 800 мың тоннаға жетті.

Астықты өңдеу өнімдері мен құрама жем тасымалы 4,2 миллион тоннаны құрады, бұл өткен жылмен салыстырғанда 57%-ға жоғары. Қытай Халық Республикасына жөнелтілген құрама жем көлемі 2,9 миллион тоннаға жетіп, төрт есеге артты.

2025 жылдың 11 айында пайдалану жүк айналымы 264,7 миллиард тонна-километр неттоны құрады, бұл 2024 жылдың сәйкес кезеңімен салыстырғанда 7,4%-ға артық.