Астанада локомотивтерді техникалық қызмет көрсету пункті күрделі жөндеуден кейін ашылды

Rail-news.kz хабарлағандай, Астана локомотив пайдалану депосында локомотивтерді техникалық қызмет көрсету пункті (ЛТҚК/ПТОЛ) күрделі жөндеуден соң салтанатты түрде ашылды.

1975 жылы салынған ПТОЛ ғимараты толық жаңартылды. Күрделі жөндеу инженерлік жүйелерді жаңғыртуға, технологиялық жабдықты жаңалауға және персонал үшін жайлы жағдай жасауға мүмкіндік берді.

Нысанның жалпы ауданы 2 888 шаршы метр. Жаңартылған ғимаратта депо кезекшілерінің орындары, қызметкерлерге арналған душ бөлмелері, нұсқаушы бөлмелері және жылдамдықөлшегіш ленталарды дешифрлеу инженерлерінің кабинеттері орналасқан.

Жүргізілген жұмыстар еңбек жағдайын айтарлықтай жақсартты, өндірістік қауіпсіздік деңгейін көтерді және жылжымалы құрамға қызмет көрсетудің тиімділігін арттырды.

Ай сайын бұл пунктте шамамен 1 100 локомотивке қызмет көрсетіледі. Мұнда 110 қызметкер еңбек етеді, олардың қатарында әкімшілік-басқару персоналы, пайдалану бөлімшелерінің қызметкерлері және слесарьлар бар.