Қытай мен Қазақстан арасындағы жүк тасымал көлемі өсуде

2025 жылдың алғашқы бес айында ҚХР мен Қазақстан арасындағы теміржол жүк айналымы 14,2 млн тоннаға жетіп, өткен жылдың осы кезеңімен салыстырғанда 11 %-ға артты. Қазақстаннан Қытайға экспорт 12 %-ға өсіп, 9 млн тоннаны құрады.

Алтынкөл станциясы арқылы 6,5 млн тонна (өсім 22 %), ал Достық станциясы арқылы 7,7 млн тонна (өсім 3 %) тиеп жөнелтілді. Мұндай оң динамика екі елдің теміржол әкімшіліктерінің тиімді ынтымақтастығы мен Қытай бағытына транзиттік және экспорттық тасымалдарға тұрақты сұранысқа байланысты.

«Қазақстан темір жолы» ҰК» АҚ Қытаймен шекарадағы өткелдердің инфрақұрылымын дамытып, өткізу қабілетін арттыру жұмыстарын жалғастыруда. Бұл болашақта тасымал көлемін одан әрі көбейтуге жол ашады.