Ұлы Отан соғысының ардагері Григорий Степенко ғасырлық мерейтойын атап өтті

Қарағанды-Сұрыптау станциясының Теміржолшылар мәдениет сарайында Ұлы Отан соғысының ардагері Григорий Степенконың 100 жылдық мерейтойы өтті.

Мерейтой иесін салтанатты түрде Алихан Бөкейхан ауданының әкімі Досбол Кулекеев, «ҚТЖ – Жүк тасымалы» ЖШС –  «Қарағанды ЖТ бөлімшесі» филиалының директоры Марат Ибраев, «Қазақстандық салалық темір жол, автомобиль, әуе және су көлігі қызметкерлерінің кәсіби одағы» ҚБ Қарағанды филиалының төрағасы Яхия Алмусин, сондай-ақ «ҚТЖ – Жүк тасымалы» ЖШС – «Қарағанды ЖТ бөлімшесі» филиалы кәсіподағының алғашқы ұйымының төрағасы Ғалы Ермекбаев құттықтады. Мерейтой иесіне естелік сыйлықтар мен гүлдер табыс етілді.

Григорий Степенко 1925 жылы 10 сәуірде Воронеж облысының Нижний Ровинки ауылында дүниеге келген. 1943 жылы Павлодар облысының Лозов РВК Қызыл Армия қатарына шақырылды.

Алғашқы шайқас шомылдыру рәсімі 2-ші Украина майданында пулеметші ретінде қабылданды. Орел-Курск бағытындағы қорғаныс операциясына, Белгород, Харьков, Курск, Кенигсберг, Варшаваны азат етуге қатысты. Ол контузияға ұшырады. Днепр өзеніне өту операциясына қатысқан. Забайкалье майданының 39-армиясы 19-шы гвардиялық атқыштар дивизиясының 56-шы гвардиялық атқыштар полкінің құрамында Қиыр Шығыстағы жапондарға қарсы шайқастарға қатысқан.

Григорий Петрович II дәрежелі Отан соғысы және II дәрежелі Даңқ ордендерімен, «Ерлігі үшін», «Жауынгерлік еңбегі үшін», «1941-1945 жылдардағы Ұлы Отан соғысындағы Германияны жеңгені үшін», «Варшаваны азат еткені үшін», «Кенигсбергті алғаны үшін» медальдарымен және  көптеген мерейтойлық медальдармен марапатталған. 1951 жылы жолдамамен Қарағандыға келген.Ол  «Шахтострой» басқармасына қарасты цемент зауытында, теміржол көлігінде - жүк тасымалы бойынша бас бақылаушы қызметінде еңбек етті. 1980 жылы зейнетке шықты.

Іс-шараның қорытынды бөлімінде  Теміржолшылардың мәдениет сарайы қызметкерлері, жергілікті әртістер мен оқушылар ұйымдастырған мерекелік концерт өтті.