Қостанай станциясында өрт-тактикалық жаттығулар өтті

Қостанай станциясының әкімшілік-тұрмыстық кешенінің ғимаратында шартты өртті сөндіру бойынша іс-қимылдар пысықталды.

Оқу-жаттығуға теміржол өрт сөндірушілерінің, мемлекеттік өртке қарсы қызметтің бөлімшелері, азаматтық қорғаудың өртке қарсы буындарының құрамалары қатысты: жеке құрамның 43 адамы, техниканың үш бірлігі, сондай-ақ Қостанай станциясының өрт поезы.

«Оқу-жаттығудың мақсаты – Қостанай облысы ТЖД, «Қазақстан темір жолы «ҰК» АҚ арасындағы өзара іс-қимылды пысықтау, өрт сөндіру үшін тартылатын құралымдардың дайындығын тексеру, сондай-ақ жеке құрамды оқыту», - деді мемлекеттік емес өртке қарсы қызметтің бастығы Сұлтан Смамбаев.

Аңыз бойынша, электр жылыту құралдарын пайдалану ережелерін бұзу нәтижесінде ғимараттың бірінші қабатында өрт шыққан.

Оқиға орнына келген өрт сөндірушілер барлау жүргізіп, күштер мен құралдарды енгізудің шешуші бағытын анықтап, жауынгерлік учаскелерді белгілеп, өртті сөндіруге кірісті. 25 минуттан кейін шартты өрт толығымен жойылды.