Павлодар ЖТ бөлімшесі Өндірістік қауіпсіздік және экология бөлімінің бастығы Эльмира Қараханова екінші жыл қатарынан ҚТЖ жеңіл атлетика марафонында жеңіске жетті. Биыл жарысқа 400 теміржолшы қатысты. Олар 5, 10 км қашықтықты еңсерді. Ең дайындығы мықтылары  ұзақ қашықтыққа - 21 шақырымға жол тартты. Теміржолшылар балалары мен зейнеткерлер 2 шақырымдық қашықтыққа жүгірді.

Марафон қорытындысы бойынша 40 жастан 49 жасқа дейінгі санаттағы әйелдер арасындағы 10 шақырымдық жарыста Эльмира Қараханова ең жылдам болып шықты. Өткен жылы ол 5 шақырымдық жарыста марафонда жеңіске жеткен болатын.

Эльмира теміржолда 20 жылдан астам уақыт жұмыс істейді. Спорттық наградалардан басқа, оның жеке жетістік қоржынында «Адал еңбегі үшін» төсбелгісі де бар. Соңғы екі жылда Эльмира спортпен белсенді айналысады. Ол фитнес пен жүгіруді ұнатады.