Максим КОШЛЯКОВ, Аягөз локомотив пайдалану депосының машинисі
Мен қазір Аягөз станциясында машинист мамандығы бойынша жұмыс істеймін. Қазақи ауылда туып, өскеннен кейін өзімді қазақтың «бір найманымын» деп мақтанамын. Бәлкім, мұны айтуымның өзі Қазақстандағы қазіргі тұрақтылық, жүздеген ұлт өкілдері тұрып, тату-тәтті өмір сүріп жатқан бейбітшілікті сүюші елдің мүшесі болғандығымнан шығар деп ойлаймын.
Ал осындай тұрақтылыққа, тәуелсіздікке біз Елбасы Н.Назарбаевтың көрегендігімен, саясаткерлігі арқасында қол жеткізіп отырмыз. Мұндай мемлекеттік ұстамдылық болмаған күнде халіміздің қаншалықты күйде болатыны айтпаса да белгілі болар еді. Оны көрші елдерде болып жатқан қырғи қабақ соқтығыстардан, алауыздықтардан байқап жүрміз. Ол жақтардағы қиындық ел арасындағы жүргізіліп жатқан саясаттың өз мәнінде еместігінен деп білемін.
Мен Павлодар қаласындағы машинистер дайындайтын курста оқып, білім алдым. Бүгінгі күні Елбасының өзі жасатып жатқан «Эволюшн» тепловозында машинист болып жүрмін, соған өзім де қуаныштымын әрі мақтан етемін.
Елбасының қолдауымен қазірде көптеген жастар шет елде білім алып жатыр. Олардың ішінде АҚШ-тағы «Эволюшн» фирмасында болған мен сияқты машинистер де бар. Қаншама жүк пен адам тағдыры машинистерге байланысты болғандықтан, біздің жұмысымыздың ауыртпалығы да, жауапкершілігі де біздің мойнымызда болады. Сондықтан мен өз мамандығымды таңдап алған соң барынша іскерлікпен, ізденіспен атқарғым келеді.
Бүгінгі теміржолшылар съезінде Елбасы- ның кандидатурасы кезектен тыс президенттік сайлауға ұсынылғандықтан, мен мұны қолдап, өзге әріптестерімнің де бұл ұсынысты қолдап, сайлау кезінде Елбасы үшін дауыс береді деп сенемін.
