«Союз ТМА-20» ғарыш кемесі тасымалданған пойыз қозғалыс кезінде қателіктер жіберген жоқ - «Локомотив» АҚ президенті

«Союз ТМА-20» ресейлік ғарыш кемесін тасымалдаған пойыздың жылдамдықты өлшеу ленталарындағы деректерді тексергеннен кейін, теміржол көлігін жүргізу мен тежегіштерді басқару кезінде ешқандай қателіктер болмағаны анықталды. Бұл туралы «Локомотив» АҚ-ның президенті Қадыл Таласпеков мәлім етті.

«Аталмыш пойыз үшін локомотивтер мен локомотив бригадалары арнайы жүктерді тасымалдауға арналған ережелерге сәйкес жасақталды. Бригадалар мұндай пойыздарды басқаруда тәжірибелері бар І және ІІ дәрежелі машинистерден құралған. Және олардың тізімі белгіленген тәртіп бойынша бекітілді», - дейді Қ.Таласпеков.

Оның айтуынша, пойыз соңғы нүктеге жеткенге дейін тежегіштерді шұғыл түрде қолданған жоқ. Арнайы пойыз шекарада қабылданып, ресейлік теміржолшыларға тапсырылғанға дейін, локомотив бригадасына қарауыл бастығы мен пойызға ілесіп жүрушілер тарапынан ешқандай шағым айтылмаған. Пойыз ресейлік әріптестерге ешбір ескертулерсіз тапсырылды.

Еске салайық, қазанның 6-сы күні кейбір бұқаралық ақпарат құралдары «Союз ТМА-20» ғарыш кемесін тасымалдау контейнерінің зақымдануы, оның Қазақстан аумағымен тасымалдануы барысында орын алуы мүмкін деген ақпарат таратқан болатын.

Гүлмира Әлиакпарова